Cuentan as chens d’o lugar de Bergua, que fa muitas, muitismas añadas, amanexió por istos puestos un mesache de ziudá, como tantos atros antis, con muitos deseyos e ilusions: quereba cambear a suya bida, fer proyeutos d’autochestión, pero mas que mas meter-se en contauto con a naturaleza.
Ta ixo buscó un puestacho tranquilo, lexos d’as chens y de os roidos, y a la fin s’acomodó en una espelunga, muito zerqueta d’o Barranco de Forcos.
Astí fació, con cuatro cantals y aprobeitando o foricacho, a suya nueba casa. Metió un ortal chicorrón, unas gallinas pa os güegos, y un par u tres de crabas pa tener lei fresca, fer bel quesote u talmén pa minchar crabito.
O mesache estió por istos puestos una temporada, pero… ya sapez. A vida en istas montañas no ye cosa de chanza. O luengo ibierno, a soledá, a fambre y as malas condizions se l’apoderón y bel día, (como muitos atros que plegoron buscando una bida millor) le se remató a barruntada y se’n tornó ta casa.
Pilló os pocos trastes que’n teneba y regaló as gallinas, pero… no sapeba que fer con as crabas. Denguno d’o lugar quereba cudialas asinas que l’unica ozión yera matar-las anque… teneba pocas trazas pa fer matazía, y muitas prisas por marchar ta tierra baxa.
Asinas que a la fin, pensó que a millor ozión serba soltar-las por o mon, pa que eras a lo menos, bibisen goyosas y libres, ixa bida en contauto con a naturaleza que o mesache tanto eba deseyato en o pasau, pero que agora aborrezeba.
E dizen que dende ixe dia, un camatón de crabas salbaches e periglosas biben en as Isualas, y que ya puez parar cuenta si puyas por ixos mons, no siga que te’n trobes con istas bestias rancorosas d’os ombres, que bel dia quedoron albandonatas a o suyo destín, y obligatas por as duras condizions a fer-sen salbaches y endinas.
Y si bel dia puyas ta Bergua y te’n trobas con as chens d’o lugar fendo una güelladeta ta ra Solana pa beyer si mana o Barranco San Zalbe u o Barrancón d’as Neras, de seguro te’n dirán: “-¡Mira, as crabas salbaches!” Pero tú solo beyerás unos puntetes chicorrons y blancos, que bien poderban estar crabas, zaborros u matas.
Con isto remata a istoria, y anque dende o lugar no se distinga si están crabas, zaborros u matas… l’atro dia, puyando por ixos mons buscando A Isuala, trobamos unos animalotes blancos y pardos que brincaban por os cantals, y que bien poderban estar as crabas salbaches d’o Solano Bergua.
No hay comentarios:
Publicar un comentario